لمبے بالوں کی خواہش ہے؟ ان مشوروں پر عمل کریں!

لمبے، گھنے اور خوبصورت بال صرف خواتین کے حسن میں اضافہ ہی نہیں کرتے بلکہ مردوں کو بھی جاذب نظر بناتے ہیں۔ مگر اس کے لیے ضروری ہے کہ بالوں کی صحت کا خیال رکھا جائے اور ضرورت پڑنے پر ان کی تراش خراش بھی کروائی جائے۔ اگر آپ بھی مستقل قریب میں لمبے بال رکھنا چاہتے یا چاہتی ہیں تو اس ضمن میں ماہرین کے ان مشوروں پر ضرور عمل کریں۔

روزانہ دھونے سے پرہیز
جی ہاں، بالوں کو روزانہ شیمپو سے دھونے کی ہرگز ضرورت نہیں۔ پانی میں شامل مختلف اجزا بشمول کلورین اور شیمپو مل کر بالوں میں موجود قدرتی تیل کو نقصان پہنچاتے ہیں جس سے ان کے بڑھنے کی رفتار کم ہوجاتی ہے۔ اس لیے روزانہ شیمپو استعمال کرنے کے بجائے ایک دو روز کے وقفے سے بالوں کو شیمپو سے دھوئیں۔

دو مرتبہ شیمپو کا استعمال
بال گیلے کریں، شیمپو لگائیں اور پھر اسے دھولیں۔ ایسا ایک نہیں دو مرتبہ کریں۔ ماہرین کہتے ہیں کہ ایسا کرنے سے بالوں کی بہتر صفائی ہوتی ہے اور اگر آپ کے بال چکنے ہیں تو انہیں زیادہ دیر تک خراب ہونے سے بچایا جاسکتا ہے۔ ماہرین کہتے ہیں کہ دوسری مرتبہ شیمپو استعمال کرنے کے بعد کنڈیشنر کا استعمال بھی مفید ہے۔

نرم برش سے بال بنائیں
سخت برش نہ صرف آپ کے بالوں بلکہ سر کی جلد کو بھی نقصان پہنچاتے ہیں۔ جبکہ نرم برش بالوں کو سنوارنے میں آسانی کے ساتھ انہیں ٹوٹنے سے بھی محفوظ رکھتا ہے۔ ماہرین کہتے ہیں کہ بال دھونے کے بعد دستے والا چوڑا برش استعمال کرنا چاہیے اس طرح آپ کم وقت میں اور زیادہ آسانی سے بال سنوار سکیں گے۔

بالوں کو خشک کرنا
گیلے بالوں کو جلد خشک کرنے کے لیے ہیئر ڈرائیر کا استعمال عام ہوچکا ہے جو گرم ہوا خارج کر کے بالوں سے نمی کو ختم کرتے ہیں۔ لیکن جلد بازی میں گیلے بالوں کو بہت زیادہ گرم ہوا سے خشک کرنے کی کوشش سخت نقصان کا باعث بن سکتی ہے۔ اس سے بال کڑک اور کمزور ہوجاتے ہیں۔ اس لیے کوشش کریں کہ بالوں کو جلانے کے بجائے ہیئر ڈرائیر کو کم از کم درجہ حرارت پر رکھیں۔

پانی زیادہ پیئں
جسم کے دیگر حصوں کی طرح بالوں کو بھی صحت بخش رہنے کے لیے پانی کی ضرورت پڑتی ہے۔ آپ کے جسم میں جتنی زیادہ تری ہوگی اتنے ہی اچھے بال اگیں گے۔ ماہرین کہتے ہیں کہ اگر آپ کے لیے دن بھر پانی پینا ممکن نہیں تو تربوز اور گاجر جیسے پھل اور سبزیوں کا استعمال کریں جو جسم میں پانی کی ضرورت پوری کرنے میں معاون ہیں۔

فیس بک پر تبصرے



تبصرہ کریں